المكان اللي تحس فيه إنك مو مسافر!

نحتاج بعض المرات الى رحلة خفيفة نغّير فيها جو، نعيد التوازن، وتخلينا نرجع بطاقة جديدة. وهذا بالضبط اللي حصل خلال ويكندنا السريع إلى مسقط – سلطنة عمان الإقامة كانت في واحد من أفخم وأجمل فنادق المنطقة فندق ماندارين أورينتال.

من أول لحظة وصولنا، حسّينا بشعور دافئ... أمان، حفاوة، راحة نفسية، وطمأنينة. المكان فيه طاقة ما تنوصف، تحس إنك فعلاً بديرتك، مو بديرة ثانية. حتى تعامل الناس وكلامهم وابتسامتهم تعكس كرم وأصالة أهل عمان.

أول انطباع… يدوم

أول ما وصلنا، كانت إجراءات الدخول سلسة وسريعة.
موظفة الاستقبال "مريم" كانت لبقة، راقية، ومحترفة جدًا. شرحت لنا كل شي نحتاج نعرفه بدون إطالة، وهذا شي قدّرناه جدًا خصوصًا إننا كنا واصلين الفجر ومرهقين من السفر.
كان معانا موظف مختص "زاك"وصّل لنا الجناط للغرفة بكل لباقة، وشرح لنا تفاصيل الغرفة والمرافق اللي فيها، مواعيد الفطور، السبا، والنادي الرياضي. طريقة التعامل تحسسك إنك ضيف مميز، مو مجرد نزيل عادي.

الريوق… والصباحات الجميلة

مطعم الريوق عندهم بكل بساطة فخم ومتنوع.
فيه نكهات من كل ثقافات العالم: أطباق شرقية، غربية، صحية، وحتى خيارات نباتية. طريقة العرض مرتبة بشكل يخليك ودك تجرب كل شي.
الطاولات مرتبة بمسافات مريحة، الأجواء هادئة، والإطلالة على المسبح والبحر تزيد من روعة التجربة. الخدمة سريعة والموظفين بشوشين والابتسامة ما تفارقهم. الحلو في الخدمة ان الموظفين موجودين حولك طول الوقت بدون ازعاج او مقاطعة. هذا شي مهم يزيد ميزة على المكان.

الغرفة… والإطلالة على خليج عمان

الغرفة واسعة و شرحة ومصممة بذوق رفيع: ألوان هادية، تفاصيل خشبية، ولمسات عمانية أصيلة في الديكور.
السرير مريح جدًا، الإضاءة مدروسة غير مزعجة، والحمّام فيه كل اللي تحتاجه وأكثر.
الإطلالة؟ خيال. تطل على خليج عمان مباشرة، والغروب من البلكونة كان مشهد يأخذ العقل. وصوت أمواج البحر ومنظر الخضار والشجر يخليك تنسى كل شي.

تجربة السبا الاستثنائية

من أكثر التجارب اللي استمتعت فيها. جربت "تريتمنت اللبان"، علاج مميز مدته ساعتين بدأ بجلسة تقشير باستخدام سكرب من مكونات طبيعية مستوحاة من اللبان (خذيت منهم الوصفة إن شاء الله أشاركها معاكم قريب)، بعدها جلسة مساج عميق، وجلسة تشافي باستخدام الصوت. والختام كان بخور اللبان لتجديد الطاقة وتنقيتها.  
طلعت من السبا وأنا حاسة بجسمي خفيف ومخي مرتاح. فعليًا كل الشد والإرهاق اختفوا. كان فعلاً وقت خاص لي ومن أجمل وامتع تجارب السبا اللي سويتها.

عطور أمواج… لمسة فاخرة من التراث

داخل الفندق في بوتيك مميز لعطور أمواج، وحدة من أفخم وأقوى البراندات العمانية العالمية.
البوتيك مصمم بطريقة تخليك تعيش التجربة بكاملها، من الشرح التفصيلي للمكونات، لتجربة العطور حسب ذوقك ومزاجك.
أنا اخترت عطر "بوربس ٥٠" فعلًا على ذوقي، فخم وراقي وثابت وكذلك من أكثر العطور مبيعًا.

اكتشاف مدينة مسقط

الفندق نظم لنا رحلة مدتها ٥ ساعات لاكتشاف أهم معالم مسقط التاريخية والثقافية، وكان معانا مرشد عماني محترف، خلانا نعيش التجربة بكل تفاصيلها.

جامع السلطان قابوس الأكبر

بدت الرحلة بزيارة التحفة المعمارية بكل معنى الكلمة، جامع السلطان قابوس الأكبر. الدقة في التفاصيل، الفخامة، والسكينة داخل الجامع، كلها تخليك تنبهر وتفتخر بهذا المعلم الإسلامي الفريد.

سوق مطرح

ثاني محطة كانت سوق مطرح. مكان يفوح بعبق التاريخ عمره أكثر من ٢٠٠ سنة. ريحة اللبان والبخور بكل زاوية، المحلات متخصصة بالمشغولات اليدوية، الفضيات، الخناجر، الأقمشة التقليدية، البهارات، المجامر، وحتى الحلوى العمانية اللذيذة. تجربة وايد ثرية.

المتحف الوطني

بعدها زرنا المتحف الوطني. صرح ثقافي ضخم يضم ١٤ قاعة مختلفة، كل قاعة تسرد جزء من تاريخ سلطنة عمان، من الحضارات القديمة إلى العصر الحديث. تجربة تعليمية ممتعة ومبهرة.

دار الأوبرا السلطانية

ختام الرحلة كان في دار الأوبرا السلطانية. أول دار أوبرا في الخليج والجزيرة العربية، فخمة من الخارج والداخل. تستضيف فعاليات عالمية، حفلات، عروض مسرحية، وكلها في صرح معماري يجمع بين الحداثة والأصالة.

عشاء ختامي في مطعم ايسنزا الإيطالي

رجعنا للفندق واختتمنا اليوم بعشاء في مطعم ايسنزا الإيطالي. مطعم راقي داخل الفندق.
الأجواء كانت رومانسية وهادية، الموسيقى ناعمة، الأطباق متقنة ولذيذة، والخدمة استثنائية.
طلبنا سي فود باستا و مارغاريتا بيتزا وريزوتو بالمشروم، وكانت كل لقمة ألذ من الثانية. فعلاً ختام ولا أروع.

الانطباع العام؟

اللي فعلاً ميّز الرحلة هو تجربة الفندق وتعامل الموظفين.
من أول لحظة وصلنا فيها إلى آخر دقيقة، كل موظف التقينا فيه كان محترف، مبتسم، ومتعاون لأقصى درجة. الكل يعاملك بذوق وأدب جنك ضيف في بيتهم.

خلاصة التجربة

إذا تبون بريك من زحمة الحياة واسترخاء، رفاهية، وثقافة في نفس الوقت، أنصحكم من القلب بـمسقط وفندق ماندارين اورينتال. متأكدة انها بتكون من أجمل السفرات وأروع التجارب.