أريج الخرافي .. المثابرة والتغلب على الشدائد

Oct 25, 2022

No items found.

مكياج: حصة الصانع، الشعر: صالون لوازو، مجوهرات: بوميلاتو، أزياء: العثمان فاشن

‍

مقالات رشا الصباح

نتعرف هذا الشهر على أحد رواد الأعمال الكويتيين الأوائل الذين ظهروا على وسائل التواصل الاجتماعي، لأكثر من 10 سنوات وهي تواصل إلهام الناس مع التغلب على العقبات الكبيرة.

تجلس أريج مع 3oud.com وتتحدث عن مواجهة التحديات بسبب صعوبات التعلم لديها، وقرارها بالعودة إلى الجامعة وخبراتها التجارية.

Top: Halmut Lang (Alothman fashion) jewelry Pomellato

بما أنج متحدثة تحفيزية، شنو إلي يحفزج؟

الحب هو المحفز الأساسي في حياتي، حبي للشيء اللي اعمله وحبي للتعلم واني أتطور دايم. حبي للناس يخليني أحاول أكون شخص له تأثير إيجابي عليهم. إذا عملت أي شي أحب دايم تكون النتيجة تأثيرها قوي وجميل ولها أثر إيجابي.

بالفترة الي فاتت شاركتي متابعينج ببرامج التواصل الاجتماعي انج تخرجتي من الجامعة، شنو كان الدافع الي خلاج تردين تدرسين؟

أنا تخرجت من المعهد التجاري من 20 سنه تخصص محاسبه وكانت فكرة أني أكمل الدراسة الجامعية تراودني دايم، ولكن كانت الدراسة صعبة بالنسبة لي من غير ما أعرف السبب. بعد اكتشافي أنه فيني صعوبات تعلم بعمر 32 قررت بعمر 35 الرجوع لمقاعد الدراسة. إذا عرفت المشكلة تعرف تحلها وهذا اللي صار معاي.

سولفيلنا عن الصعوبات الي واجهتيها في التعلم ومتى اكتشفتيها؟

اكتشفتها بعمر 32 بعد ما كنت أعاني بشكل مستمر من أغلاطي الاملائية بحثت وقرأت عن شي اسمه دسلكسيا، قلت يمكن فيني؟

عملت الاختبار واكتشفت أنه فيني نوعين من صعوبات التعلم: الدسلكسيا وتشتت الانتباه. بعد ما عرفت صرت أبحث عن طرق للتعامل مع هذي الصعوبات وقدرت أسيطر عليها في مشواري الجامعي والدليل تخرجي بمعدل 3.22.

شنو تعريفج للنجاح؟ وممكن تكونين ناجحة بدون ما تفشلين؟

النجاح بالنسبة لي إنك تكمل المشوار حتى بعد الفشل. الفشل جزء من النجاح، إذا ما قدرنا نخلي علاقتنا بالفشل صحية صعب ننجح لان من اول تجربة فاشلة راح نوقف. لازم ننظر للفشل بنظره تحليليه أكثر من انتقاد لنفسنا، ونحلل شنو صار وشنو تعلمنا. الدروس اللي نتعلمها من الفشل هي اللي تخلي لنا نظرة أكثر نضج، وتجارب ثرية تخلينا أكثر وعي، بس الأهم أنه نستفيد من التجربة الفاشلة والنظر لها كدرس أكثر من مجرد تجربة فاشلة نشعر بالإحراج منها.

Helmut Lang Blazer, Helmut Lang Trousers (AlOthman Fashion), Pomellato Jewellry

بما إن الوالد كاتب وصحفي وسياسي. هل فكرتي تتبعين خطواته؟

أنا أشابه الوالد في كثير من الصفات واختلف عنه في الكثير أيضاً. تعلمت من الوالد الكثير ولكن لي خط ومشوار خاص فيني. يشبه أريج بكل تفاصيله.

شلون تفكرين بأفكار جديدة لما تفتحين مشروع جديد؟

من الميزات في الأشخاص اللي يعانون من الدسلكسيا وتشتت الانتباه أنهم يفكرون خارج الصندوق. أنا ما عندي مشكله بالأفكار الخلاقة وأفكار مشاريع مميزة، من كثرهم ما أقدر أسويهم كلهم. صار عندي عادة إذا جتني فكرة مشروع افتح اللابتوب واكتب كل تفاصيلها.

من الفكرة والمبلغ المطلوب لنتفيذها وعدد الموظفين وشلون تكون مختلفة عن الأفكار اللي بالسوق وشكثر الأرباح المتوقعة، كل التفاصيل الخاصة بالمشروع. احتفظ فيها لأن تجيني أفكار كثير وأخاف أنساهم، ولما يصير وقت أبي أسوي مشروع أرجع أقيم هذي الأفكار واختار الأفضل.

A.W.A.K.E. MODE Dress (AlOthman Fashion), Pomellato Jewellry

شنو النصيحة إلي تقدمينها لأصحاب المشاريع التجارية الجديدة؟

أول شي: اشتغل في شي تحبه لأن العمل التجاري ممكن ياخذ منك وقت طويل بالشغل، وإذا ما حبيت اللي تسويه راح تمل وتكون هذي بداية النهاية. دايم أقول بلش صغير والأخطاء تكون أصغر، من غير ما تأثر عليك.
لا تسوي منتج واتدور له عميل، شوف العميل أي منتج يحتاج ووفره له.

لا تنسى التسويق. في مشاريع أفكارها حلوه بس التسويق عندهم عادي والناس ما عرفت عن المشروع وتفاصيله، وللأسف خسر بالنهاية. التسويق مهم. دير الأمور المالية بدقة مع وجود شركة محاسبة تراجع الحسابات، من الأهم الأشياء السيطرة على الأمور المالية.

اشتغلتي مع زوجج بالماضي. شلون كانت التجربة؟

من أجمل وأمتع الأشياء انج تشتغلين مع زوجج، بس أهم شي نفرق بين علاقة الشراكة والعلاقة الزوجية. في البيت احنا زوجين كل واحد ودوره في الحياة الزوجية وفي الشغل احنا شريكين، والأهم سوالف الشغل ما تكون بالبيت. إذا قدرتوا تفصلون بين الاثنين راح تستمتعون بالتجربة.

شنو أكثر شي تفتخرين فيه؟

افتخر في نفسي لأن عندي الشجاعة دايم إني اطلع من منطقة الراحة. كل ما شفت نفسي مرتاحة بالمكان اللي أنا فيه، بالنسبة لي يعني هذا الوقت اللي لازم أسوي تحدي جديد. هذا الشي خلاني شخص يتطور بشكل مستمر وأتعلم أشياء جديدة باستمرار.

A.W.A.K.E. MODE Top (AlOthman Fashion), Pomellato Jewellry.

هل في مشاريع مستقبلية حابه تشاركينها معانا؟

اللي تعلمته من حياتي التخطيط مهم، بس ما ندري وين ممكن نكون بعد سنين. قبل خمس سنوات ما كنت أتوقع إني راح أكون في بريطانيا أدرس ماجستير. في كثير من الأحيان نخطط ولكن الحياة تاخذنا في أماكن أفضل من ما كنا نتوقع. علشان جذي صرت ما أحب اقول خططي المستقبليه.